Tréimhse Mharana

Foráiltear leis an Acht go bhfuil srian ar Oifigigh Phoiblí Ainmnithe áirithe dul i mbun brústocaireachta i gcásanna áirithe ar feadh bliana tar éis dóibh a bpost nó a n-oifig a fhágáil. Is é sin le rá, tá siad faoi réir tréimhse “mharana” i dtaca le rannpháirtíocht i ngníomhaíochtaí brústocaireachta áirithe.

Is iad seo a leanas na hOifigigh Phoiblí Ainmnithe lena mbaineann: Airí agus Airí Stáit, comhairleoirí speisialta d’Airí agus d’Airí Stáit agus fostaithe fhorordaithe sa tseirbhís phoiblí (Alt 22(2)). Daoine eile ar Oifigigh Phoiblí Ainmnithe iad chun críocha na gceanglas um chlárú brústocaireachta - is iad sin, TDanna, Seanadóirí, FPEnna agus comhaltaí údaráis áitiúil - ní chuimsítear iad leis an bhforáil sin.

Ní fhéadfaidh na hoifigigh phoiblí nach gcuimsítear leis an bhforáil sin na nithe seo a leanas a dhéanamh:

• gníomhaíochtaí brústocaireachta a dhéanamh, ná
• bheith fostaithe ag duine atá ag déanamh gníomhaíochtaí brústocaireachta, ná seirbhísí a chur ar fáil dó, i gcúinsí áirithe.

Baineann na cúinsí sin leis na cásanna seo a leanas:

• Baineann an ghníomhaíocht brústocaireachta le haon chomhlacht seirbhíse poiblí lena raibh baint ag an oifigeach poiblí, is é sin le rá, áit a raibh sé fostaithe nó i seilbh oifige nó a raibh aon phost eile aige sa bhliain sular fhág sé an comhlacht, nó
• Tá an ghníomhaíocht brústocaireachta á déanamh thar ceann duine a bhí ina Oifigeach Poiblí Ainmnithe agus a raibh baint aige leis an gcomhlacht seirbhíse poiblí sa bhliain sular fhág an chéad oifigeach poiblí an comhlacht.

Féadfaidh oifigigh phoiblí ainmnithe iarratas a dhéanamh chuig an gCoimisiún um Chaighdeáin ar thoiliú chun dul i mbun brústocaireacht den sórt sin. Féadfaidh an Coimisiún um Chaighdeáin a chinneadh toiliú a thabhairt gan choinníoll, toiliú a thabhairt go coinníollach nó diúltú don iarratas ar feadh na tréimhse ar fad nó cuid di (Alt 22(5)).

Féadfaidh oifigeach poiblí nach bhfuil sásta leis an gcinneadh achomharc a dhéanamh in aghaidh an chinnidh ón gCoimisiún um Chaighdeáin chuig Oifigeach Achomhairc Neamhspleách.